یانەی بارسێلۆنا تووشی کێشەیەکی دیکە بوو، بەهۆی سەرهەڵدانەوەی پێکانی رافینیا، ئەستێرە بەڕازیلییەکەی یانەکە.
بەگوێرەی زانیارییەکانی ڕۆژنامەی “ئێل دێسمارکی” ئیسپانی، دوای ئەنجامدانی پشکنینی پزیشکی بۆ رافینیا لە ڕۆژی هەینی، دەرکەوتووە کە پێکانەکەی سەریهەڵداوەتەوە و بۆ ماوەی سێ بۆ چوار هەفتەی دیکە لە یاریگاکان دووردەکەوێتەوە.
ئەمەش لە کاتێکدایە کە رافینیا لە کۆتایی مانگی ئەیلولی ڕابردوو بەهۆی گرژبوونی ماسوولکەی ڕانی ڕاستی تووشی پێکان هات و ستافی پزیشکی ئەوکات ماوەی دوورکەوتنەوەکەیان بە سێ هەفتە دیاریکردبوو، بەڵام دواتر ماوەکەی درێژەی کێشا.
سەرچاوەکە ئاماژەی بەوەش کردووە کە هانزی فلیک، ڕاهێنەری یانەکە، زۆر نیگەرانە و پێی وایە هەڵەیەکی گەورە کراوە بە پەلەکردن لە گەڕانەوەی رافینیا بۆ یاریگاکان.
بەهۆی ئەو پێکانەوە، رافینیا بەشداری یارییەکانی چامپیۆنزلیگ و یارییەکانی لالیگای بەرانبەر چەند یانەیەک نەکردووە.
تەهاعلی ڕۆژنامەنوسی وەرزشی تایبەت بە شارەزوور پرێس