لێدوانە بێپێشینەکەی محەمەد سەلاح، ئەستێرەی میسری و گۆڵکاری مێژوویی لیڤەرپوول، دوای یەکسانبوونە بێهێزەکەیان بەرامبەر لیدز یونایتد، وەک بومبێکی چێنراو تەقییەوە و ئاڵۆزییە ناوخۆییەکانی یانەی پاڵەوانی پریمەرلیگی خستە ڕووی میدیاکان. تۆڕی ئەتڵێتیک ئاماژە بەوە دەکات کە قسەکانی سەلاح تەنها تووڕەبوونێکی کاتی نەبوو، بەڵکو ئاگرێکی گەورەی لە دوای خۆی جێهێشت کە ئێستا یانەکە بەرەو دوو ئاراستەی دژ بەیەک دەبات.
شکۆی بریندارکراو: فیرعەون دەکرێتە قوربانی!
دوای زنجیرەیەک کە 53 یاریی لەسەریەک لە پێکهاتەی سەرەکی بوو، محەمەد سەلاح لە سێ یاریی کۆتاییدا خۆی لەسەر کورسی یەدەگ بینییەوە، کە ئەمەش بۆ یاریزانێکی لەو ئاستە کارێکی دەگمەنە.
ڕاپۆرتەکان ئاشکرای دەکەن کە شکۆی “فیرعەون”ی میسری بریندار بووە و هەست دەکات بە شێوەیەکی نادادپەروەرانە کراوەتە ئامانج. سەلاح تەنها یاریزان بوو کە لە هەردوو دۆڕانە ئابڕووبەرەکەی یانەکەدا بە سەرەکی یاریی کرد، بەڵام دواتر کرایە قوربانی و وەک یەدەگ مامەڵەی لەگەڵدا کرا. ئەمەش لە کاتێکدایە یاریزانانی وەک (ئیبراهیم کۆناتێ) کە هەڵەی کوشندەی کردووە و (کۆدی گاکپۆ) کە ئاستێکی باشی نەبووە، هێشتا دەرفەتیان پێدەدرێت. ئەم دووڕووییە وایکردووە سەلاح بێزار بێت و باوەڕی وابێت شایەنی شوێنەکەیەتی.
لێدوانە خۆپەرستییەکە و ڕاستییە تاڵەکە
لەلایەکی دیکەوە، شیکارەکەی ئەتڵێتیک ڕەخنە لە کات و ناوەڕۆکی لێدوانەکەی سەلاح دەگرێت. ئاماژەی پێدەدرێت کە سەرەڕای هەموو هەستکردن بە نادادپەروەری، کردەی سەلاح دوای تێکشکانی تیپەکە بەرامبەر لیدز وەک “کردەیەکی خۆپەرستانە و بێڕێزی” تەماشا دەکرێت، کە کێشەیەکی دیکەی بۆ دۆخە ئاڵۆزەکەی یانەکە زیاد کرد.
لەگەڵ ئەوەشدا، ڕاپۆرتەکە ڕاستییەکی تاڵ دەخاتە ڕوو: “سەلاح وەک جاران نەماوە.” لەم وەرزەدا سەلاح تەنها 5 گۆڵ و ئەسیستی لە 19 یاریی تۆمارکردووە، بە بەراورد بە 34 گۆڵ و 23 ئەسیستی وەرزەکانی ڕابردوو. کاتێک ڕاهێنەر (ئارنێ سلوت) بڕیاریدا لە یاریی وێستهام دایبنیشێنێت، نادادپەروەری نەبوو چونکە ئاستی یاریزانەکە دابەزیبوو و زۆرجار لە دەرەوەی ڕیتمی یارییە. تەنانەت ئامارەکان دەری دەخەن کە لیڤەرپوول لەم ماوەیەدا بە بێ سەلاح باشتر بووە.
سەلاح کە هەفتانە 400 هەزار پاوەند وەردەگرێت و تەمەنی بەرەو 33 ساڵ دەچێت، چیتر کارتێکی پارێزراوی لە یانەکەدا نەماوە.
سیناریۆی جیابوونەوە: کێ دەڕوات؟ سەلاح یان سلوت؟
ئەم کێشەیە ئێستا یانەکەی خستووەتە بەردەم دووڕیانێکی مەترسیدار: ململانێیەکی ناوخۆیی لە نێوان ئەفسانەیەکی مێژوویی و ڕاهێنەرێک کە خاوەنەکان پشتگیری دەکەن.
پرسیارەکە لێرەدا ئەوەیە: ئایا کارگێڕیی نوێی یانەکە (مایکل ئێدواردز و ڕیچارد هیوز) دەتوانن ئاشتی دروست بکەن؟ یان دەبێت یەکێک لەوانە بچێتە دەرەوە؟
بە لەبەرچاوگرتنی پشتگیری بەردەوامی خاوەنەکان بۆ ڕاهێنەر، و ئەوەی محەمەد سەلاح بەرەو قۆناغی کۆتایی ژیانی وەرزشی دەچێت، قورسە پشتگیری ئەو یاریزانە بکرێت. ئەمەش وادەکات بژاردەی گواستنەوە بۆ خولی سعودیە ببێتە باشترین و واقیعیترین چارەسەر بۆ هەردوو لایەن، چونکە ڕێگە بە سەلاح دەدات بە شێوازێکی شایستە بڕوات و یانەکەش لەم قەیرانە ناوخۆییە ڕزگاری بێت.
ئیسماعیل عەلی ڕۆژنامە نوسی وەرزشی تایبەت بە شارەزوور پرێس