فیفا (یەکێتی تۆپی پێی نێودەوڵەتی) ڕۆژی پێنجشەممە بە فەرمی پەردەی لەسەر سێ ماسکۆتی نوێی جامی جیهانی ٢٠٢٦ لادا، کە بڕیارە لە مانگەکانی حوزەیران و تەممووزی ساڵی داهاتوو لەلایەن وڵاتانی ئەمریکا، مەکسیک و کەنەداوە میوانداری بکرێت.
ئەم سێ کارەکتەرە نوێنەرایەتی کولتوور، میرات و ڕۆحی هەر یەکێک لە وڵاتە میواندارەکان دەکەن و جێگەی سەرنجی هەوادارانی تۆپی پێ بوون، ناساندنی ماسکۆتەکان ڕۆڵەکانیان بەپێی بەیاننامەکەی فیفا ئەم سێ ئاژەڵە وەکو کارەکتەری سەرەکی لەم مۆندیالە گەورەیەدا دەردەکەون، هەروەها بڕیارە یارییەکی ڤیدیۆیی بە بەشدارییان بڵاوبکرێتەوە.
کارەکتەرەکان و ڕۆڵیان لە یاریگادا:
مەیپڵ (Maple)، کەنەدا:
جۆری ئاژەڵ/ موسێکی کەنەدییە.
ڕۆڵ/ وەک گۆڵپارێز ناسێندراوە و جلی سووری لەبەردایە، کە ئاماژەیە بۆ ڕەنگی درێسی هەڵبژاردەی کەنەدا.
زایو (Zayu)، مەکسیک/
جۆری ئاژەڵ: جاگوارێکی مەکسیکییە.
ڕۆڵ/ وەک هێرشبەر یاری دەکات و جلی سەوز لەبەر دەکات. زایو هێمای هێز و جۆراوجۆری ژینگەی مەکسیکە و ڕەنگی جلەکەی ئاماژە بە ئاڵای ئەو وڵاتە دەکات.
کلاچ (Clutch)، ئەمریکا/
جۆری ئاژەڵ/ هەڵۆیەکی سەرڕووتی ئەمریکییە.
ڕۆڵ/ وەک یاریزانێکی ناوەڕاست ناسێندراوە و جلوبەرگی شینی لەبەردایە، کە نوێنەرایەتی ڕەنگێکی دیکەی ئاڵای ئەمریکا دەکات.
سەرۆکی فیفا: مۆندیالێکی جیاواز دەبێت”
جیانی ئینفانتینۆ، سەرۆکی فیفا لە کاتی پێشکەشکردنی ماسکۆتە نوێیەکاندا ڕایگەیاند: “جامی جیهانی ٢٠٢٦ بەردەوامە لە گەشەکردن و زۆر جیاواز دەبێت. مەیپڵ و زایو و کلاچ خۆشی و وروژاندن و ڕۆحی یەکێتی دەگەیەنن، کە تایبەتمەندی پێناسەی مۆندیالە.”
ئەم سێ کارەکتەرە هەوڵێکی گەورەی فیفایە بۆ بەستنەوەی پاڵەوانێتییەکە بە شێوەیەکی کولتووری بە وڵاتە میواندارەکانەوە و وروژاندنی هەستی نیشیتمانی لەنێو هەواداراندا.
ئیسماعیل عەلی ڕۆژنامەنوسی وەرزشی تایبەت بە شارەزوور پرێس.